Павел Тимофеевич Брилин

(Брилин Павел Тимофеевич бетінен бағытталды)

Павел Тимофеевич Брилин (12.7.1913, Ресей, Алтай өлкесі, Родина ауданы,Лубягино селосы - 24.6.1969, Шығыс Қазақстан облысы Алтай қаласы) - 2-дүниежүзілік соғысқа қатысушы, аға сержант, атқыш. Брилин 1928 жылы отбасымен Қазақстанға (Шығыс Қазақстан облысы Зырянов ауданы Соловьев ауылы) қоныс аударды. Кеңес әскері қатарында Брилин 1935-39 жылдары Қиыр Шығыста шекарашы болды. 1936 жылы Турий Рог ауданындағы, 1938 жылы Хасан көлі маңындағы қақтығыстарға қатысты. Ұлы Отан соғысы басталған кезде майданға жіберілді. 71-гвардиялық атқыштар полкінің (3-Беларусь майданы, 43-армия, 24-гвардиялық атқыштар дивизиясы) жауынгері Брилин 1945 жылы 7 сәуірде Кенигсберг қаласының солтүстік-батысындағы кірпіш зауытытында болған шайқаста ерекше көзге түсті. Ол бораған оқтың астында бірінші болып зауыт ауласына кіріп, жаудың ондаған әскерін жойды. Жасаған ерлігі үшін Брилинге КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (19.4.1945). Ленин, 2-дәрежелі Отан соғысы, «Даңқ» ордендерімен және медальдармен марапатталды. Соғыс аяқталған соң әскер қатарынан босады. Алтай қаласында тұрып, кен орнында жұмыс істеді. Алтай қаласындағы көшеге Брилин есімі берілді. Жыл сайын ерлер арасында волейболдан Брилин атындағы облыстық турнир өтіп тұрады.[1]

Дереккөздер өңдеу

  1. Айбын. Энциклопедия. / Бас редакторы Б.Ө.Жақып. - Алматы: «Қазақ энциклопедиясы», 2011. ISBN 9965-893-73-Х