Бұталы орман

Бұталы орман — көп жылдық ағашты өсімдіктерден тұратын орман. Топырақтың беткі қабатында тармақтанып өседі, негізгі діңі айқын байқалмайды. Бұталы орман өсу ұзақтығы 10 — 20 жыл, кейде 40 — 50 жыл, биікт. 10 см-ден 6 м-ге дейін жетеді. Бұталы орман ағашты орманның өскінін құрайды. Далалы аймақта, таулы жерлерде, кейде орман арасындағы ашық алаңда жеке орман ретінде өсіп қалыптасады. Бұталы орманның а.ш-нда маңызы зор, оны жарқабақтарға, егіс аймақтарына өсіріп, эрозияға қарсы қолданады. Оның кейбір түрлерін ғимараттар төңірегі мен саябақтарды көркейту үшін, кейде дәрілік және азықтық маңызы үшін де өсіреді. Бұталы орманның өніп-өсуі, оның биікт. және түрлері жергілікті климатқа, топыраққа, жер бедеріне және беткей экспозициясына байланысты болады. Бұталы орман Қазақстан жерінде, көбінесе, таулы және далалық аймақтарда кең тараған.