Бөкенбай батыр көшесі (Ақтөбе)

Бөкенбай батыр көшесі – Ақтөбе қаласындағы 12, 12Б, 12ВГ, Болашақ, Авиатор және Авиақалашық аудандарын байланыстыратын, қаланың орталығынан оңтүстік-шығысына дейін тартылып жатқан 4 жолақты көше.

Аталуы

2009 жылдың 22 шілдесінде Ақтөбе қаласы әкімдігінің №1766 қаулысы бойынша Ақтөбе қаласының орталығындағы атаусыз көше Бөкенбай батыр көшесі болып аталды. Бұл көше атауы – антропонимнің годонимге айналуының бір үлгісі, яғни көшеге адам атының берілуі. Бөкенбай Қараұлы – Кіші жүздің Табын руынан шыққан әйгілі батыр, жоңғар шапқыншылығына қарсы күрескен қолбасы. Көшенің ашылу салтанаты 2009 жылдың 11 желтоқсанында Тәуелсіздік күніне орайластырылып өткізілген болатын, бұл іс-шараға Бөкенбай батырдың Орал, Атырау, Ақтау өңірлеріндеге ұрпақтары, атқарушы билік пен мәслихат өкілдері, ғылым және мәдениет қайраткерлері қатысты.

Орналасуы

Профессор Закратдин Байдосовтың айтуынша, Бөкенбай батыр көшесінің Әбілқайыр хан даңғылының оң жағында орналасуында символикалық мән жатыр, өйткені көзі тірісінде батыр Әбілқайыр хан саясатының басты қолдаушыларының бірі болған екен. Бөкенбай батыр көшесі Әбілқайыр хан даңғылы мен Григорий Павлович Мясоедов, Зоя Космодемьянская, Әз Наурыз көшелерінің қиылысынан (11, 12-шағын аудандар) басталып, Ақтөбе халықаралық әуежайы мен Авиатор саябағына дейін барады. Жалпы ұзындығы – шамамен 5,5 шақырым. Көше 4 жолақты, жалпы тік болып келеді, Красин, Мұқағали Мақатаев, Мұхтар Әуезов көшелері және Сәңкібай батыр даңғылы тұйықталатын тұстарында бағытын біраз өзгертеді.

Бөкенбай батыр көшесімен Сұлтанмахмұт Торайғыров, Алтай Батыр, Морозов Тұйық, Міржақып Дулатов, Мұқағали Мақатаев, Әл Фараби, Алмас Қылыш, Алаш, Шәкәрім Құдайбердіұлы, Біржан Сал, Мағжан Жұмабаев, Мұхтар Әуезов, Шалқар, Қарабұлақ, Ғарышкер, Гүлдер, Бақыт көшелері тұйықталады.

Қаланың ескі бөлігінен басталатын Әкімжанов көшесі Әз Наурыз көшесіне, ал соңғысы Бөкенбай батыр көшесіне жалғасады. Көшеге Әл Фараби көшесі арқылы байланысатын Мәншүк Мәметова көшесіне Сазды өзені жағалай ағады. Сондай-ақ, Бөкенбай батыр көшесі айналма жол арқылы Сәңкібай батыр даңғылымен және Богослов тасжолымен байланысады.

Көрнекті ғимараттар мен орындар

Бөкенбай батыр көшесін жағалай “Ұлытау”, “Асылжан”, “Алтын”, “Ариадна”, “Нұр Дана” мейрамханалары, “Dastan” қонақ үйі, сонымен қатар “Jýsan” банкі, “Құрылысшылар” аллеясы, “Қызғалдақ” мүсіні, “Ақтөбеде жасалған” гүл бағы, “Юнис-сити” аллеясы, Ақтөбе халықаралық әуежайы, №72 IT мектеп-лицейі, Ақтөбе медициналық орталығы, Авиатор саябағы орналасқан.

Қоғамдық көлік

Бөкенбай батыр көшесі қаладағы ең ұзын әрі ең ірі көшелердің бірі болғандықтан көптеген қоғамдық көлік маршруттары осы көшені басып өтеді. Олар: №7, №22 №28 №43 №48 №10 маршруттары. Көшеде “Дастан”, “Бөкенбай батыр көшесі”, “Кең дала”, “Көктем”, “Болашақ”, “Юнис-сити”, “Емхана” атты аялдамалар орналасқан.