Василий Степанович Кречетов

Василий Степанович Кречетов (1.1.1916, Ресей, Алтай өлкесі, Бийск ауданы–29.02.2012) - 2-дүниежүзілік соғысқа қатысушы, қатардағы жауынгер, катер жүргізуші.


1936 жылы Алматы қаласына келіп, Астық дайындау («Заготзерно») базасында шофер болып жұмыс істеді. 1941 жылдың 26 маусымынан майданда болды. 1941 жылы маусым-шілде айларында Брянск қаласы түбінде бірінші рет ұрысқа кірісті. Кречетов кейін Смоленск қаласы түбінде болған ұрыстарға қатысты. Истра, Днепр, Березина, Висла, Одер өзендерінен өтті. 1945 жылы сәуірде 2-Беларусь майданының, құрамында 9-жеке мотопонды көпір батальоны бар бөлімдері, Берлин қаласына жақын жердегі соғысу бөгеті - Одер өзенінен өтуі керек болды. Батальон командирі барлық күшті өзеннен өтуге жұмылдыру туралы бұйрық берді. Кречетов өз катерімен бірінші болып Одер өзенінен өтті. Өзеннен ойдағыдай өту Берлинді алып, соғысты аяқтауда үлкен рөл атқарды. Одер өзенінен өткенде көрсеткен ерлігі үшін Кречетовке КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (25.6. 1945).

Соғыстан кейін Кречетов Алматыға қайтып оралып, партия және кеңес қызметінде болды. 1955 жылы өз еркімен тың және тыңайған жерді игеруге атсалысты. Ол Солтүстік Қазақстан облысы, Ғабит Мүсірепов ауданындағы Ставрополь машина-жол станцияның директоры болып қызмет етті. Кречетов соңғы жылдары Алматы қаласында тұрды. Қалған деректер мұрағаттық ізденуді қажет етеді.[1]

ДереккөздерӨңдеу

  1. Айбын. Энциклопедия. / Бас ред. Б.Ө.Жақып. - Алматы: «Қазақ энциклопедиясы», 2011. - 880 бет. ISBN 9965-893-73-Х