Витаминді жемшөп

Витаминді жемшөп – өсімдік тектес және жануар тектес азық, сондай-ақ құрамында витамині көп құрама жем. Рационға В. ж. қосу арқылы витамин қоспасын қолданбай-ақ малдың витамин қажетін өтеуге болады. А витамині мен каротин балық майында, уызда, сүтте, жұмыртқада, көк шөпте көп болады. Бұршақ тұқымдас шөптерде (беде, жоңышқа, сиыр жоңышқа, эспарцет, т.б.) каротин көп. Мыс., 1 кг мұндай шөпте 30 – 100 мг, астық тұқымдас шөптерде (қарабидай, сұлы, арпа, судан шөбі, атқонақ, т.б.) 20 – 70 мг каротин болады. Шөпті кептіргенде, әсіресе, пішенді жаңбырлы күні жинағанда каротин мөлшері күрт кемиді. Шөпті күн сәулесіне кептіргенде және арнаулы қорада желдеткіш көмегімен құрғатқанда каротин 20 – 25%, шөп кептіргешпен құрғатқанда 85% сақталады. Барлық мал үшін ең жақсы В. ж. – қолдан кептірілген пішен ұнтағы. Мұның жоғары және 1-сортының 1 кг-нда 110 – 250 мг каротин болады. Сүрленген азықта да каротин жақсы сақталады.