Восход ашық акционерлік қоғамы

«ВОСХОД» Ашық акционерлік қоғамы – өндіріс саласындағы ірі кәсіпорындардың бірі. 1956 ж. шағын өндірістік артель негізінде фабрика болып құрылды. 1964 ж. фабрикаға Қызылорда, Жамбыл тігін фабрикалары біріктіріліп, «Восход» бірлестігі атауы берілді, ал 1989 ж. өндірістік тігін бірлестігіне айналды. 1992 ж. өндірістік-сауда тігін фабрикасы аталды, 1993 жылдан бүгінгідей аталады. Акционерлік фирма құрамында жеке тапсырыс бойынша сәндік киім тігіп, фирма, банк, авиакомпания, қонақ үй, дүкен қызметкерлеріне арнап киім үлгілерін даярлаумен және дизайндық жоба жасаумен айналысатын «Восход» сән үйі, тағы екі тігін кәсіпорыны бар. «Восход и К» ЖШС түрлі өндірістік бұйымдар үшін арнайы киім тігеді. Екінші кәсіпорын «Восход и Юг» ЖШС жүннен даярланған матадан ерлер костюмін тігеді, сонымен қатар мұнайшылар мен газшыларға арнайы киім әзірлейді. 1997 ж. «Даму бағытында серіктесу» Халықар. бағыттаушы кеңесі фирма ұжымына «Алтын қыран» сыйлығын және жоғары өндірістік деңгей мен өнім сапалылығы үшін берілетін «Үлкен алтын сына» сыйлығын фирма өнімін «Алтын сына» белгісімен шығару құқығымен қоса табыс етті. 1801 ж. Францияда іргесі қаланған Ұлттық өнеркәсіпке көмектесу ассоциациясы да «Алтын медалін» берді. 2003 ж. «АДМ Бизнес Консалтинг» Халықаралық одағының құрылтайшы кеңесі киім-кешек өндірісі саласының дамуына елеулі үлес қосқаны үшін «Сала озаты» сыйлығын тапсырды.