Галина Сергеевна Уланова
Галина Сергеевна Уланова (8.1.1910, Санкт-Петербург - 21.3.1998, Мәскеу) - 1951 жылдан КСРО Халық артисі, 1943 жылдан Қазақстанның Халық артисі.
| Галина Сергеевна Уланова | |
|---|---|
 Галина Сергеевна Уланова | |
| Дүниеге келгені: | 8.1.1910 |
| Қайтыс болғаны: | 21.3.1998 |
1928 жылы Ленинградтың хореографиялық училищесін (өзінің шешесі М.Ф.Романова мен А.Н.Вагановадан сабақ алды) бітіргеннен кейін осындағы С.М.Киров атындағы опера және балет театры труппасына қабылданды.[1] 1944—1960 жылдары Үлкен театрдың балет труппасында соло-биші болды. Ұлы Отан соғысы жылдары Қазақ опера және балет театры труппасында қызмет етіп, ұлттык би өнерінің қалыптасып, дамуына елеулі үлес қосты. Басты партиялары: Жизель, Раймонда (Аданның және Глазуновтың осы аттас балеттерінде), Джульетта (Прокофьевтің "Ромео мен Джульеттасында"), Мария (Асафьевтің "Бақшасарай фонтанында"), тағы басқа. Ол жасаған сахналық арулар тұлғасынан сұлулық пен сымбаттылық, нәзіктік пен қайсарлық, ұяңдық пен мөлдір сезім күйлері аса жарасымдылық тапты. Уланова — П.И.Чайковский балеттерінің негізгі партияларының үздік орындаушысы ретінде де белгілі. Мысалы "Ұйқыдағы арудағы" Аврора, "Аққу көліндегі" Одетта-Одилия, "Щелкунчиктегі" Маша. Оның бишілік өнері хореографиялық элементтердің және мәнерлеу тәсілдерінің айрықша үйлесім табуымен, таңғажайып орындаушылық шеберлігімен ерекшеленді әрі орыс хореография мектебінің негізгі қағидалары мен дәстүрін ілгері дамытты. Гастрольдік сапармен Аустрияда, АҚШ-та, Италияда, Қытайда, Ұлыбританияда, Францияда және тағы басқа елдерде өнер көрсетті.[2]
Дереккөздер өңдеу
- ↑ Қазақ мәдениеті. Энциклопедиялық анықтамалық. Алматы: “Аруна Ltd.” ЖШС, 2005 ISBN 9965-26-095-8
- ↑ Өнер: Жалпы білім беретін мектептің жаратылыстану-математика бағытындағы 11-сыныбына арналған оқулық/Қ.Болатбаев, Е.Қосбармақов, А.Еркебай. — Алматы: "Мектеп" баспасы, 2007. ISBN 9965-33-998-8
| Ортаққорда бұған қатысты медиа файлдар бар: Category:Galina Ulanova |