Гедик паша

Гедик паша

ГЕДИК ПАША — Стамбұлдағы түрік театры. 1869 ж. құрылған. Түрік тілінде спектакльдер қойған алғашқы ұлт театры. Ол 19 ғ-дың соңында Түркия театр өнерінің орталығына айналды. Театрға жеке адамдар қамқорлық жасады. Түріктің көрнекті жазушылары Мехмет Алибей, Реджайзаде Экрем, Намық Кемал, т.б. театр ісіне қызу араласты. Алғашқыда аударма пьесалар (Мольер, Гольдони, Гюго) қойылды. Кейін театр репертуарынан түрік қаламгерлерінің пьесалары (Али Хайдардың “Бехчет Бейі”, Мехмет Алибейдің “Мылжың шаштаразы”, т.б.) орын алды. 1873 ж. Намық Кемалдың “Отан” атты пьесасының қойылуы театр тарихында үлкен оқиға болды. 1876 жылдан бастап музыкалық спектакльдер де қойылған. Мұнда тұңғыш ұлт актерлары — Ахмет Фехим, Ахмет Неджип, Хамит, Бююк Исмаилдар өнер көрсеткен. 1882 ж. Абдулхамид ІІ сұлтанның әмірімен театр үйі қиратылып, осыдан кейін “ Гаусс п.” өз жұмысын тоқтатқан.

Дереккөздер

“Қазақ Энциклопедиясы”, 2-том