Георгий Тимофеевич Рыжов

Георгий Тимофеевич Рыжов(14.11.1919 жылы туған, Шығыс Қазақстан облысы, Зырянов ауданы, Соловьев селосы) - 2-дүниежүзілік соғысқа катысушы, аға сержант. 1942 жылы қаңтар айында Кеңес әскері қатарына алынып, алғаш рет Элиста қаласы түбінде ұрысқа қатысты. 1944 жылы 13 сәуірде 34-гвардиялық атқыштар дивизиясының бөлімдері Тираспольден оңтүстікке қарай 35 шақырым жердегі Днестр өзеніне келіп жетіп, арғы бетке өту қамына кірісті. 107,5 биіктігіне орныққан жау әскері шығыс жағалаудан өзенге түсетін барлық жолды бақылауына алып, пулеметпен атқылаумен болды. Құрамында Рыжов бар он бір жауынгерден тұратын бөлімше аса маңызды осы биіктікті тартып алып, жаудың он жеті карсы шабуылын тойтарды да, оны күші басым жаудан 36 сағат бойы қорғап тұрды. Қарсы шабуылдардың бірінде командир жараланып, биіктікті қорғау ісін Рыжов басқарды. Олар 2 ротадан аса жау әскерін жойды. Осы топтың он біріне де, оның ішінде Рыжовқа КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (13.9.1944). Соғысты Рыжов Будапештте аяқтады. Ленин, 1-дәрежелі Отан соғысы, «Қызыл Жұлдыз» ордендерімен марапатталды. Соғыстан кейін Алматыға келіп, «Жолсуқұрылыс» («Дорводстрой») тресінде жұмыс істеді.