Геофизикалық болжау полигоны

ГЕОФИЗИКАЛЫҚ БОЛЖАУ ПОЛИГОНЫ, Қазақстан ҒА Сейсмология ин-тының жер сілкіну құбылыстарын зерттеуге және болжауға арналған ені 100 км-ге, ұзындығы 200 км-ге созылған (Іле Алатауының солт. беткейі, Іле ойысының біраз бөлігі және Қапшағай бөгенінің солт. шекарасы) бақылау орны. 1972 ж. ұйымдастырылған. Полигондағы болжамдық бақылауларға Қазақстан ғылым академиясының Сейсмология ин-ты, т.б. мамандандырылған мекемелер қатысады. Полигонның негізгі нысандарын тірек сейсмик. ст-лар («Талғар», «Күрті», «Медеу»), аймақтық сейсмик. ст-лар («Күрметі», «Шелек», «Іле», «Фабричная»), радиотелеметр. және гидрогеохим. ст-лар торабы («Горельник», «Төменгі Каменка», «Алмаарасан», «Пригородная», т.б.) құрайды. Геофизикалық болжау полигонының кешендік зерттеулерінің нәтижелері жер сілкіну каталогын жасаудың негізі болып саналады. Сонымен бірге ол сейсмик. аудандастыру және микроаудандастыру, күшті жер сілкінулерді қысқа және ұзақ мерзімдік болжау мәселелерін шешу үшін де пайдаланылады. Геофизикалық болжау полигонының нысандарында жүргізілген байқаулар нәтижесі негізінде жер қыртысы қабаттарында болатын құбылыстар туралы нақты қорытындылар жасалады. Зерттеу нәтижелері Алматыдағы тұрғын үйлер мен өнеркәсіптік нысандарды жобалауда пайдаланылады.