Гимнокалициум

ГИМНОКАЛИЦИУМ (GYMNOCALYCIUM) – кірпігүлдер тұқымдасына жатады. Отаны Оңтүстік Америка. Боливия, Уругвай, Парагвай, Оңтүстік Бразилия мен Аргентинада 100-ден аса түрлері таралған. Табиғатта көлемі өте үлкен болғанымен, бізде үй жағдайында олардың көлемі 2,5 см-ден 30 см аралығында, түсі жасыл, барлығының пішіні шар тәрізді, бірақ шар пішінінің үстіндегі қырлары әртүрлі болып келеді. Көп түрлері 2-3 жылдан кейін-ақ гүлдей береді. Гүлдері сабақ басында орналасқан. Тікенекті өсімдіктен сондай керемет әдемі гүл шығатыны таңқалдырарлықтай. Түсі ақ, күлгін, сары және аралас түсті болып келеді. Гүлдеу мерзімі 10 күнге созылады. Барлық кірпігүлдер сияқты гимнокалициумның да күтімі жеңіл болғандықтан, үй жағдайында өсіру оңай. Бірақ әдемі гүлін көру үшін, қыс айларында демалыс беріп, суғаруды тоқтатып, құрғақ, жарық бірақ салқын жерге орналастыру қажет. Қазіргі кезде жасанды егу жолдарымен шығарылған Михановичтің гибридталған гимнокалициумдары қолданыста көбірек кездеседі. Бұл гимнокалициумдардың түсі сары, қызыл, қызыл-сары болып келеді.

Гимнокалициум
Ғылыми топтастыруы
Дүниесі: Өсімдіктер Бөлімі: Magnoliophyta Табы: Magnoliopsida Тегі: Гимнокалициум

Жарығы:

Жарық жерді ұнатады, тіке түскен күн сәулесіне шыдамды.

Жылуы:

Қыс айларында 8-10 °C салқындылық қажет, егер осы температуралық жағдай сақталмаса, гүлдемей қояды.

Суғарылуы:

Көктемде және жазда жиі суғарады. Күзден бастап суғаруды қысқартады. Қыс айларында мүлдем суғармайды.

Ылғалдылығы:

Ылғалдылықты қажет етпейді. құрғақ ауаға төзімді. Су бүркуді қажет етпейді. Дегенмен де тазарту мақсатында су бүркіп жапырақтарын жуып немесе дымқыл матамен сүртіп тұру қажет.

Қоректендірілуі:

Көктем, жаз айларында кірпігүлге арналған тыңайтқышпен қоректендіреді.

Аурулары:

Ауру мен зиянкестерге шалдыға бермейді. Дұрыс күтім жасалса мүлдем ауырмайды.

Көбейтілуі:

Оңай жолы жанама өскіндері арқылы көбейту, тұқымы арқылы да көбейтуге болады.

Сілтемелер

• Гүлстан, өсімдіктер туралы сайт Мұрағатталған 20 ақпанның 2012 жылы.

Дереккөздер

"Гүлстан" республикалық ғылыми-танмыдық, көпшілік журнал, 2010 жыл ISSN 2078-6727