Денудация

Денудация (лат. denudatio - жалаңаштану) — уатылған тау жыныстарының жер бетінің ойпаң бөліктеріне сырғу немесе тасымалдану (сумен, желмен, мұздықпен, ауырлық күшінің тікелей әсерімен) процестерінің жиынтығы. Денудацияның қарқыны мен сипатына тектоникалық қозғалыстардың тербелу шегі және жылдамдығы әсер етеді. Тектоникалық көтерілудің нәтижесінен Денудация басым болса, онда ер аймақтың абсолют және салыстырмалы биіктіктері ұдайы үгіліп, жер бедері біртіндеп төмендеп отырады. Соның нәтижесінде таулы аудандар белесті жазықтарға — пенепленге айналуы мүмкін. Денудацияның қарқындылығын өзендермен ағып келіп жиналған тосқындардың мөлшерінен көруге болады (мысалы, Амазонка өзенінің алабынан жылына 1 млрд т-дан астам тосын жиналады).