Диапауза

Диапауза (грек. dіapausіs – үзілу, кідіру) – жануарлар дамуының белгілі бір кезеңінде зат алмасу, т.б. тіршілік процестерінің бәсеңдеп, организм дамуының кідіруі. Көптеген жануарларда Диапаузаның басталуы және аяқталуы күн ұзақтығына, темп-раға байланысты. Коловраткаларда, төм. сатыдағы шаянтәрізділерде, шегірткелерде, тұт жібек көбелегінде, кейбір кемірушілерде, жыртқыштарда (бұлғын, қара күзен) ұрықтанған аналық клетканың бөлшектенуіне дейін эмбриондық Диапауза болады. Дернәсілдік Диапауза долана көбелегінің, қуыршақтық Диапауза қараала көбелек пен капуста қоңыр көбелегінің дамуында кездеседі. Бұлардың қуыршағы ағашта және топырақ арасында қыстап шығады. Масаларда, жапырақ жегіш қоңыздарда Диапауза имагосатысында байқалады. Диапауза кезінде организмнің қолайсыз жағдайларға төзімділігі артады.