Домбыраға қол сұқпа

"Домбыраға қол сұқпа" - Абайдың өлеңі. Жазылған жылы белгісіз.

Әрқайсысы 4 тармақты 6 шумақтан тұрады, 24 жол. Бұл өлеңді 1940 жылы белгілі абайтанушы ғалым Қ. Мұқаметханов пен Абайдың інісі Ысқақтың немересі Әрхам Абай ауданының азаматы Р. Мамырқазовтан жазып алып, Республика Ғылым академиясына тапсырған. Алғаш рет «Әдебиет және искусство» журналының 9-санында баспа жүзінде жарық көрген. Сол нұсқа бойынша Абай шығармаларының 1940 жылы шыққан жинағына енгізілген. Өлеңнің мазмұнына қарағанда, ақын өмірінің соңғы жыларына жазылған тәрізді. Мұнда автор өткен өмірін еске алып, қам көңілмен жабығып отырған бір сәтте қасындағы сүйікті жарына сөз арнап, жанына жәрдем, көңліне медеу күткендей болады; жылы жүзіңмен іштегі дертіме дауа бол, езіңнің риясыз жақсы қылығыңмен қайғының ертін сөндір, қажыған көңілді қамқор жанашырлықпен қайтадан түлет дегендей тілек білдіреді. Өлең 7 буынды шалыс ұйқас үлгісімен жазылған. Басылымдарында текстологиялық өзгерістер кездеспейді. Туыңды ағылшын, қарақалпақ, қырғыз, орыс, өзбек, ұйғыр т. б. тілдерге аударылған.

Абайдың бұл өлеңіне комп. М. Жанболатов ән шығарды, композитор М. Сағатов романс жазған.