Есеп айырысу шоты

Есеп айырысу шоты - кәсіпорынның (фирманың, компанияның, т. б.) ақшалай қаражатты сақтау, есеп айырысу, несие және кассалық операцияларының барлық түрлерін жүзеге асыру үшін банкіде ашқан шоты.

Оны банк мекемесінде ашу үшін мынадай құжаттар табыс етіледі:

• шот ашу туралы басшы мен бас бухгалтер қол қойған өтініш;
• кәсіпорынды құру және оны тіркеу туралы шешім;
• бекітілген жарғының көшірмесі;
• несиеге өкім жүргізушілердің (басшы мен бас бухгалтердің) қойған қолдарының үлгілері;
• кәсіпорын мөрінің қойылған таңбасы бар карточка.

Есеп айырысу шотында сатып алушылар мен тапсырыс берушілерден өткізілген өнім (орындалған жұмыс, көрсетілген қызмет) үшін кәсіпорын кассасынан түскен ақшалай қаражат, қысқа мерзімді несие, түрлі дебиторлық берешек, негізгі қызметпен байланысты басқа да түсімдер есептеледі.