Жанболат Әлиханұлы Аупбаев

Жанболат Әлиханұлы Аупбаев (1951 ж. т.), журналист. Негізгі тақырыбы - қазақ елінің кешегі, бүгінгі тарихындағы тағдыры, сирек мамандық иелері, табиғат құпиялары, Әуезов өмірінің беймәлім беттеріне қатысты ақтаңдақтар. Аупбаев Мұхтартануға 1977 ж. араласты. Ол жазушының 1959 ж. «Өскен өркен» романына қажетті материалдар жинау үшін Оңтүстік өңіріне жасаған Шымкент - Темірлан - Шаян - Созақ - Кентау - Түркістан - Шәуілдір - Арыс сапарының ізімен 18 жылдан соң жүріп өтті. Осының нәтижесінде бір кездері Мүханды көріп-білген адамдармен кездесіп, олардың ауызекі айтқан естеліктері мен сақталып қалған қолтаңба, фотосуреттерді жинастырып, Әуезовтің 80 жылдық мерейтойы қарсаңында «Тұлпар тұяғы тиген жер» атты танымдық мақалалар сериясын жазды («Лениншіл жас», 18, 20, 22, 25, 27 қараша, 1977). М. Әуезов мұражайының директоры, Ләйла Мұхтарқызы жөнінде «Музей-aнa» («Қазақстан пионері», 7 наурыз, 1978), орнитолог Ернар Мухтарұлы туралы «Алакөлде бір құс бар...» («Лениншіл жас», 16 шілде, 1980), Мұрат Мұхтарұлы жайында «Әуезов - Әуезовтің ұлы» («Халық кеңесі», 8 қаңтар, 1993) атты мақалалар жариялады.