Жауапкер

Жауапкер, азаматтық құқықта — талапкердің арызы бойынша азаматтық іске қатынасатын қарсы жақ. Жауапкер жеке азамат, кәсіпорын, мекеме, ұйым болуы мүмкін. Азаматтық іске қатыстырылатын Жауапкер құқығы талапкермен тең жағдайда болады. Жауапкер істің жайымен танысып, үзінді жазып алуға, іс құжаттарының көшірмесін талап етуге құқылы. Іс сот мәжілісінде қаралған кезде оның дәлел келтіруіне, іске қатысушыларға, куәларға, сарапшыларға сұрақ қоюына, сотқа ауызша және жазбаша түрде түсінік беруіне шек қойылмайды. Сот шешімі шыққаннан кейін, Жауапкер бұл шешімге қатысты заңда қарастырылған мерзім ішінде одан жоғары сот орындарына наразылық білдіре алады. Талапкердің тілегі қанағаттандырылған жағдайда сот ісіне байланысты оның барлық шығындарын Жауапкер өтеуге міндетті. Егер талап қабылданбаса, Жауапкер ол іске байланысты шеккен зиянын өтеуді талап етуіне қақылы.

Сілтеме

Қазақ энциклопедиясы