Жезқазған (альбом-кітап)

Жезқазған - 2004 жылы Алматы қаласындағы «Үш қиян» баспасынан қазақ және орыс тілдерінде жарық көрген альбом-кітап; көлемі 208 бет. Құрастырған С.Қожамсейітов. Жезқазған қаласының 50 жылдық мерейтойына арналған. «Жезқазған жарты ғасырда», «Мысты өңір», «Бүгінгі Жезқазган», «Дәстүрлер», «Жезқазғанды қоршаған әлем», «Маңызды оқиғалар шежіресі» атты бөлімдерден тұрады. Альбом-кітапта мыс кен орнын геологиялық зерттеу, Қарсақбай мыс зауыты, Жезқазған кеніші, Байқоңыр көмір ошағы өндіріс орындарының тарихы көрсетілген.

Үлкен Жезқазғанның бүгінгі бейнесі, рухани дүниесі, адамдары туралы деректер мен суреттер бар. Арнаулы бөлімде мыс қаласының келбеті, дәстүрлері, оның айналасында орналасқан археологиялық тарихи, мәдени, табиғат ескерткіштері берілген. Академик Қаныш Сәтбаевтың Жезқазған қаласының қалыптасуынан бастап, дамуына баса назар аударып, зор көмек көрсеткені, оның қамқорлығы арқасында темір жолы мен электр желілерінің келуі, Кеңгір суқоймасы мен алып шахталардың, байыту фабрикаларының, мыс қорыту зауытының салынуы, Үлкен Жезқазғанның одан әрі дамуы, Қаныш Сәтбаев атындағы Жезқазған кен-металлургия комбинаты, Сәтбаев қаласы туралы мәліметтер баяндалған.