Жексенбек Еркімбеков

Жексенбек Еркімбеков (5.1.1930 жылы туған, Алматы облысы, Ескелді ауданы, Биғаш ауылы - 21.01.2018, Алматы[1] Мұрағатталған 20 ақпанның 2018 жылы.) – мәдениет және қоғам қайраткері, ҚР-ның еңбек сіңірген өнер қайраткері (1994).

Алматы мемлекеттік консерваториясын домбырашы-дирижер, оқытушы мамандығы бойынша бітірген. Қазақ радио коммитетінің жанындағы ұлт-аспаптар оркестрінде, Құрманғазы атындағы халық аспаптар оркестрінде домбырашы болған ол Бухарест қаласындағы Дүниежүзілік жастар мен студенттердің 4-фестиваліне қатысып, арнайы дипломмен марапатталды. 1956 – 58 жылдары Алматы хореография училищесінің директоры, Қазақ радиосы музыка редакциясының көркемдік жетекшісі, Қазақ КСР-і ән-би ансамблінің директоры, 1959 – 61 жылдары Қазақстан КП ОК-нің мәдениет секторының меңгерушісі, 1961 – 66 жылдары Қазақтың мемлекеттік академия опера және балет театрының директоры қызметтерін атқарды. 1966 – 76 жылдары Қазақ КСР-і Мәдениет министрлігінде өнер басқармасының бастығы, министрдің орынбасары, Мәдениет министрі (1976 – 87) болып қызмет етті.

Қазақ ұлттық консерваториясының құрметті профессоры

9 – 11-сайлау Қазақ КСР-і Жоғарғы Кеңесінің депутаты. 2 рет “Құрмет белгісі” ордені және бірнеше медальдармен марапатталған.