Жерден тыс өркениет
Жерден тыс өркениет — басқа планеталар жүйесіндегі даму деңгейі жөнінен адамзат қоғамымен қарайлас не одан жоғары деп жорамалданатын ақыл-ой иелерінің қоғамы. Жерде тіршіліктің, сондай-ақ, ғаламда орасан көп планеталар жүйесінің болуы ғаламның қандай да бір басқа аймағында да тіршіліктің пайда болуы мүмкін деген пікір айтуға негіз болды. Сондықтан тірі материяның жоғары дәрежеде ұйымдасқан түріне дейін дамуы, Жерден тыс өркениеттің пайда болу мүмкіндігі жөніндегі тұжырым да дұрыс болып есептеледі. Космонавтиканың дамуы Жерге басқа дүниеден ақыл-ой иелері келіп-кетіп тұрады деген жорамалдар жасауға себеп болды. Тіпті ертедегі көне ескерткіштердің (мыс., Египеттегі пирамидалар, т.б.) жасалуын, т.б. мәселелерді сырттан келген ақыл-ой иелерінің келіп-кетуімен байланыстырған жәйттер де кездеседі. Біздің заманымызда Жерге мұндай келіп-кетушілерді “көргендер”, Жерден тыс өркениетпен байланыстырылған “ұшқыш тәрелкелер” мен “таныс емес ұшқыш нысандарды” бақылаулар көбейді. Алайда, мұндай “фактілер” іле-шала жердегі құбылыстар тұрғысынан, тіпті олардың кейбіреуі мистикалық тұрғыда түсіндірілді. Планеталардағы физ. жағдайлар жөніндегі 20 ғ-дың ортасында орындалған зерттеулердің нәтижесінде, Күн жүйесіндегі планеталарда (Жерден басқа), жоғары дәрежеде ұйымдасқан тіршіліктің болуы мүмкін емес деген қорытынды жасалды. Егер Марста тіршілік болса, онда ол алғашқы қарапайым түрде болады деп жорамалданды. Күнмен шамалас көптеген жұлдыздардың (планеталар жүйесі бар) төңірегіндегі физикалық жағдайларды зерттеудің нәтижесі мұндай жұлдыздардың планеталар жүйесінде тіршіліктің пайда болу және даму ықтималдығын ерекше төмендетті. Қазіргі кезде “экзосфера” аймағы (тіршіліктің дамитын аймағы) жұлдыздардың аз ғана бөлігінде бар деп есептеледі. Соңғы уақытта Жерден тыс өркениетпен ақпарат алмасу үшін әр түрлі диапазондағы электрмагниттік сәулелер пайдаланыла бастады. Сонымен Жерден тыс өркениеттің болуы жөніндегі мәселе тәжірибе жүзінде дәлелденбеген өте ықтимал жорамалға жатады. Ғаламда Жерден тыс өркениеттің таралу ықтималдығы, Жерге басқа дүниеден келетіндердің ықтималдығымен бірдей деуге болады. Дегенмен космонавтиканың одан әрі дамуы және ғаламнан келетін сәулелерді жете зерттеу Жерден тыс өркениеттің болатындығын не болмайтындығын анықтауы тиіс. [1]
Сыртқы сілтемелер
өңдеуДереккөздер
өңдеу- ↑ Қазақ энциклопедиясы,3 том
| Бұл мақаланы Уикипедия сапа талаптарына лайықты болуы үшін уикилендіру қажет. |
|
Бұл — мақаланың бастамасы. Бұл мақаланы толықтырып, дамыту арқылы, Уикипедияға көмектесе аласыз. Бұл ескертуді дәлдеп ауыстыру қажет. |