Жеребе

Жеребе, жеребе тарту — жарысқа қатысушы жеке спортшылар мен командалардың қарсыласын анықтайтын әдіс. Жеребе арқылы жарысқа қатысушы спортшылардың қай нөмірмен шығатындығын да анықтайды. Мұндай шара шаңғышылар, велосипедшілер жарысына тән. Кейбір жарыстарда спортшылардың қай жолмен бақ сынайтыны жеребе бойынша анықталады (мыс., жеңіл атлеттер мен жүзгіштер бәсекесінде, спорттық ойындарда). Сондай-ақ, қай команда алаңның қай жағында ойнайтындығы және допты кім бірінші болып ойынға қосатындығы, дойбы, тоғызқұмалақ, шахмат жарыстарында бірінші болып кімнің жүріс жасайтындығы да жеребе бойынша анықталады. Аталмыш спорт түрлеріндегі швейцария тәсілімен өтетін жарыста әр тур алдында жеребе тарту өтеді. Бокс, теннис жарыстарында ең мықты спортшыларды жартылай финалға дейін бір-бірімен кездеспейтіндей етіп бөледі де, басқа спортшылар арасында жеребе өтеді. Сонымен қатар, жеребе ақындар айтысында, басқа өнер сайыстарында да қолданылады.