Жол жүрісіне қатысушы

Жол жүрісіне қатысушы – көлік жүргізушісі, жаяу жүргінші, көлік құралдарының жолаушысы, т.б. ретінде жол жүрісіне тікелей қатысқан адам. Қазақстанда азаматтардың жол жүру қауіпсіздігіне қатысты құқықтарына мемлекет кепілдік береді және бұл құқықтар Қазақстан Республикасының “Жол жүрісі қауіпсіздігі туралы” Заңы мен Қазақстан Республикасы қол қойған халықаралық келісім-шарттарды орындау жолымен қамтамасыз етіледі. Жол жүрісіне қатысушының өз құқықтарын іске асыруы басқа жол жүрісіне қатысушылардың құқығын шектеуге немесе бұзуға тиіс емес. Жол жүрісіне қатысушы белгіленген ережелерге сәйкес жолмен еркін және кедергісіз жүруге; қарамағында автомобиль жолдары бар атқарушы өкімет органдарынан, жергілікті өзін-өзі басқару органдарынан, заңды тұлғалар мен азаматтардан жол жүрісінің қауіпсіз жағдайлары туралы ақпарат алуға; тиісті уәкілеттік берілген лауазымды адамдардан жолмен жүруге шек қоюдың немесе тыйым салудың себептері туралы және жолдардың жол қауіпсіздігін қамтамасыз етуге қатысты сапасы мен көрсетілетін қызметтер туралы толық ақпарат алуға; жол-көлік оқиғасы кезінде заңдарда, өзге де нормативтік-құқықтық актілерде немесе берілген лицензияда көзделген ақысыз медициналық көмек алуға; құтқару шараларымен, т.б. жедел көмекпен қамтамасыз етілуге; жол-көлік оқиғалары салдарынан дене жарақатын алған, сондай-ақ көлік құралдары зақымдалған жағдайда шеккен зиянының заңдарда белгіленген негіз бойынша және тәртіппен өтемін алуға; жол жүру қауіпсіздігін қамтамасыз ету саласында өкілеттікті жүзеге асырушы лауазымды адамдардың заңсыз әрекеттері жөнінде заңдарда белгіленген тәртіппен шағынуға құқылы. Жол жүрісіне қатысушы Қазақстан Республикасының “Жол жүрісі қауіпсіздігі туралы” Заңының және осы заңға сәйкес шығарылған нормативтік-құқықтық актілердің талаптарын орындауға міндетті.