Жоспар (архитектура)

Жоспар, архитектурада – архитектуралық құрылыс ғимараттарының немесе адамдар қоныстанатын мекендердің төбесінен қарағандағы көрінісінің белгілі бір масштаб бойынша қағаз бетіне түсірілген сызбасы не макет түріндегі көрінісі. Мұндай жоспарда салынбақшы құрылыстың жалпы аумағы мен әрбір бөлмелерінің ауданы, негізгі қабырғалары, терезе мен есік орнатылатын қуыстары, пеші, су құбыры, басқышы, санитарлық және техникалық қондырғылары, кей жағдайда архит. бөлшектеріне дейін көрсетіледі. Егер ғимарат көп қабатты болған жағдайда әрбір қабатқа жеке жоспар жасалады, үй төбесін жабу күрделі болған кезде оның арнайы жоспары құрылады. Жеке ғимараттар жоспарынан басқа құрылыстың жалпы ауласының үйлесімділігі, қала орамдарының жарасымдылығы, көше мен алаңдардың орналасуы, сондай-ақ адамдар қоныстанатын тұтас мекендердің (ауыл, қала) ұнасымды болып шығуы мақсатында бас жоспар жасалады. Фотосуретке түсірілген жоспар мен жобалау жоспары екі басқа нәрсе. Біріншісі – дайын тұрған ғимараттың суретке түсірілген көшірмесі де; екіншісі – архитектура құрылысты жобалау кезінде жасалған жоспар Құрылыс жобасын жасау жоспар эскизінен басталады. Жоспар, негізінен, ғимараттың не мақсатпен салынатынына байланысты архитектура композициясының үйлесімді болып шығуы үшін жасалады.