Жүсіп Ақбаев

Жүсіп Ақбаев (туған жылы белгісіз – 1959 жыл) – Алаш қозғалысына қатысушы. 1917-1919 жылдары Батыс Алашорданың Ырғыз өңіріндегі жұмыстарына белсене қатысқан. 1918 жылғы қаңтар айында өткен Сырдария қазақтарының Түркістандағы сиезіне қатысқан. 1918 жылы Ырғызға келген Міржақып Дулатұлына серік болған. 1918-1919 жылдары Батыс Алашорданың Ырғыз уездік бөлімінде Алашорда отрядының азық-түлікпен қамтамасыз ету жұмыстарын басқарды. Кеңес үкіметі орнағаннан соң әртүрлі жұмыстар атқарған. 1927 жылы «Алаш» партиясының идеяларын насихаттады, байлардың мүдделері үшін күресті деген айыппен бір топ Алаш қозғалысына қатысушылар мен бірге Калугаға жер аударылады. 1930 жылы мерзімі аяқталған соң, Орск қаласына келіп тұрады. Осы қалада үш жыл тұрғаннан кейін Ақтөбеде, қуғын-сүргін жылдары Өзбекстанда тұрған. Бұдан кейінгі жылдары Ақтөбеге қайтып келген. Өмірінің соңғы жылдарында біржолата дінге бет бұрып, шариғат жолына түскен.