Жүсіп Байболатұлы Қыдыров

Жүсіп Байболатұлы Қыдыров(18 наурыз 1937 жыл, Қызылорда облысы, Жаңақорған ауданы Талап ауылы - 1983)- ақын.

1960 жылы Әл-Фараби атындағы Қазақ ұлттық университетінің филология факультетін (журналистика бөлімшесін) бітіріп, баспасөз орындарында әр түрлі қызмет істеген. 1960— 1966 жылдары «Лениншіл жас» («Жас Алаш») газетінде әдеби қызметкер, бөлім меңгерушісі, 1966—1967 жылдары Ш.Айманов атындағы «Қазақфильм» студиясының дубляж бөлімінде аға редактор, 70-жылдардың соңымен 80-жылдардың басында «Жалын» баспасында аға редактор болды.

Әдебиетке 60-жылдардың басынан бастап араласқан. Алғашқы бір топ өлеңі республика жас ақындарының «Жырға сапар» атты жинағында басылды. Кейіннен бірнеше жыр кітабы өмірге келді. Алматы, Мәскеу баспаларынан орыс тілінде жинақтары шыққан. Шығыс поэзиясының жүлдыздары — Рудакидің, Хафиздің, Физулидің, сондай-ақ Шелли мен Блоктың жырларын қазақшалаған.

«Мың бір күн» өлеңдер жинағы үшін 1984 жылы (қайтыс болғаннан кейін) Қазақстан Жазушылар одағы сыйлығының лауреаты атағы берілді. Алматы қаласы көшелерінің біріне есімі берілген.

Шығармалары

• Тұңғыш кітап. Өлеңдер. А., «Жазушы», 1964;
• Таңғы сәт. Өлеңдер мен поэма. А., «Жазушы», 1966;
• Жұлдыздарға жол. Өлеңдер. А., «Жазушы», 1969;
• Нұржаусын саған. Поэмалар, балладалар. А., «Жазушы», 1974;
• Под вечным солнцем. Стихи. А., «Жазушы», 1975;
• Гүлқайыр. Өлеңдер. А., «Жазушы», 1976;
• Жанартау жүрек. Өлеңдер. «Жазушы», 1978;
• Гүл ашқан шақ. Өлеңдер. А., «Жалын», 1979;
• Жайсаң жаз. Таңдамалы. А., «Жазушы», 1980;
• Жібек жел. Поэмалар, өлеңдер. А., «Жалын», 1981;
• Құмыр бұлбұл. Өлеңдер. А., «Жазушы», 1982;
• Мың бір күн. Өлеңдер. А., «Жалын», 1983;
• Цветок счастья. М., «Молодая гвардия», 1983;
• Үкілі домбыра. Күйлер. А., «Өнер», 1984;
• Салтанатым, шеруім. Таңдамалы. А., «Жазушы», 1985.