Иван Ильич Корнеев

Иван Ильич Корнеев(5.5. 1914, Қарағанды облысы,Бұқар жырау ауданы,Сенское селосы – өлген жылы белгісіз) - 2-дүниежүзілік соғысқа қатысушы, гвардия сержанты, зеңбірек нысанашысы. Кеңес әскері қатарына Башқұртстан Республикасындағы Новотроицк ауданы әскери комиссариаты аркылы шақырылды. Корнеев 7-гвардиялық атты әскер корпусының 15- гвардиялық Моздок атты әскер дивизиясы 147-гвардиялық артиллерия полкінің нысанашысы болып ұрыстарға қатысты. 1945 жылы 14 қаңтарда 1-Беларусь майданының әскерлері Варшава - Берлин бағытында шабуылға шықты. Кеңес әскерлері үш күнгі ұрыста 60 шақырым алға жылжып, қашып бара жатқан жауды өкшелей қуып, Ольшовец, Спала, Ошочино қалалары маңына жетті. Томашув - Мазовецки бағытындағы жеңісті одан әрі жалғастыру үшін 7- гвардиялық атты әскер корпусы ұрысқа енді. Атты әскерлер 11-танк корпусымен бірлесе қимылдап, жау қорғанысын бұзып өтіп, Лодзь қаласының маңына жетті. Осы маңда қан төгіс ұрыстар басталды. 76 мм-лік зеңбіректің нысанашысы Корнеев зеңбірегін жасырып қойып, жау жакын келгенде оқ жаудырды. Ұрыстың алғашқы сәттерінде-ақ бірнеше автокөліктер мен транспортерді, 50-ден астам жаудың әскерін жойды. Неміс-фашист әскерлерінің бөлімдері таң-сәріде Пабьяницо қаласы маңында (Польша, Лодзь воеводствосы) қоршаудан шығуға әрекет жасады. Осы ұрыста Корнеев немістің 2 танкісін жойды. Осындай ерліктері үшін Корнеевке КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (27.2. 1945). Ленин, Қызыл Ту, 2 рет 1-дәрежелі Отан соғысы,2-дәрежелі Отан соғысы, «Қызыл Жұлдыз» ордендерімен, медальдармен марапатталды. Соғыс аяқталған соң Куйбышев облысы,Жигулевск қаласында тұрды.