Иван Семенович Решетник

Иван Семенович Решетник(10.10.1924, Түркістан облысы, Мақтаарал ауданы- 14.12.1968, Ресей, Ставрополь өлкесі, Лермонтов қаласы) - 2-дүниежүзілік соғысқа қатысушы, взвод командирі, лейтенант. Украин. Кеңес әскері қатарына 1942 жылы шақырылған. Түркістандағы пулеметшілер училищесін бітіргеннен кейін (1943) Воронеж майданы 40-армия 309-атқыштар дивизиясы 957 - атқыштар полкі кұрамында Ұлы Отан соғысына қатысты. Кеңес әскері майданда шабуылды өрістете отырып, Днепрге жетті. Днепрден (Украина, Киев облысы, Кагарлык ауданы, Балыко-Щучинка селосының маңы) өту операциясын жекелеген топтар мен шағын бөлімшелер бастады. 1943 жылы 24 қыркүйекке қараған түні лейтенант Решетник бораған жау оғының астында өзінің пулемет взводын бастап Днепрден өтті. Осы ерлігі үшін Решетникге КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (23.10.1943). Соғыстан кейін әскери қызметін жалғастырды. 1967 жылы подполковник Решетник запасқа шықты. Ставрополь өлкесінің Лермонтов қаласында жұмыс істеді. Ленин, «Қызыл Жұлдыз» ордендерімен, медальдармен марапатталған.