Иван Федорович Омигов

Иван Федорович Олигов(1923, Ақмола облысы,Бұланды ауданы,Макинск қаласы - 1966, Ресей, Воронеж қаласы) - 2-дүниежүзілік соғысқа қатысушы, кіші лейтенант, кейіннен подполковник, ұшқыш. Кеңес әскері қатарына 1941 жылы шақырылып, майданға 1942 жылы жіберілді. Ол ұшқыштар мектебін бітіріп (1942), сол жылы қарашада жаумен шайқасқа түсті. Шабуыл жасаушы 828-авиациялық Свирь полкінде 1944 жылдың 20 маусымында Карелия майданының әскерлері шабуылды бастаған күні Олигов Юксино темір жолы станциясына бомба тастап, шабуыл жасауға қатысты. Ол реактивті снаряд жаудырып, сондай-ақ пулемет пен зеңбіректен оқ боратып, 100 м-дей темір жолы рельсін істен шығарды. 3 вагонды қиратып, көптеген жау әскерін жойды. Шабуыл өрістеген шақта Олиговтың үшағы Капа мен Усикюль елді мекендері маңында Вуари-Ярви көлінің маңында жаяу әскерлерді қолдап, жауға аспаннан шүйілді. Олигов 4 зеңбіректі талқандап, 3 зеңбірек пен пулеметтің үнін өшірді. Финляндия майданынан кейін Олигов З-Беларусь майданының әуе күштері қарамагына көшті. Мұнда ол Цеханув, Ломжа, Торунь, Дамерау, Хойнице, Тухаль елді мекендері ауданында ұрысты жалғастырды. Олигов соғыс кезінде 123 рет ойдағыдай жауынгерлік ұшу жасады, 9 рет әуедегі айқасқа қатысты. Оның жауынгерлік есебіне жаудың 500-дей әскері мен офицері, күйретілген 11 ұшақ, 38 дзот, 13 далалық, 62 әуе зеңбірегі, 49 әуе пулеметі және 25 миномет тіркелген. Осындай ерлігі мен батылдығы үшін Олиговқа КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (18.8.1945). Сондай-ақ ол 2 рет Қызыл Ту орденімен, «Қызыл Жұлдыз», 1-дәрежелі Отан соғысы ордендерімен марапатталды. Олигов 1960 жылы подполковник шенімен запасқа шықты. Батырдың құрметіне Макинск қаласындағы №1 мектепке есімі берілген.