Инвестицияларды кепілдендіру жөніндегі көпжақты агенттік

Инвестицияларды кепілдендіру жөніндегі көпжақты агенттік – халықаралық құқық және агенттік мүшелерінің ішкі заңдарының нормаларына сәйкес толық заңды тұлға болып табылатын дербес халықаралық ұйым.

Инвестицияларды кепілдендіру жөніндегі көпжақты агенттікті құру идеясы 1950 ж. пайда болды, алайда 1985 ж. Сеулде арнаулы Конвенция қабылданғаннан кейін ғана құрылды. Агенттіктің міндеті – өндіріс мақсатында мүше елдер арасында Халықаралық қайта құру және даму банкінің (ХҚДБ), Халықаралық қаржы бірлестігі мен басқа да халықар. қаржы мекемелерінің қызметтерін толықтыра отырып, инвестициялар ағынын реттеу. Агенттікке ХҚДБ мүшелерінің барлығы мүше бола алады. Алғашқы мүшелерінің қатарына 1987 жылдың 30 қазанына дейін Конвенцияға қосылған мемлекеттер жатады. Агенттіктің құрылымы басқа халықар. мекемелердің, негізінен, ХҚДБ мен Халықаралық қаржы бірлестігінің құрылымына сәйкес келеді. Агенттік Басқарушы кеңестен және Директорлар кеңесінен, сондай-ақ Президент пен өзге қызметкерлерден құралатын үш сатылы құрылымнан тұрады. Агенттік қызметін Директорлар кеңесінің төрағасы (ХҚДБ Президенті) басқарады. Орталығы Вашингтонда (АҚШ, Колумбия) орналасқан. Қазіргі уақытта оған 114 ел, оның ішінде Қазақстан да мүше болып табылады.