Исламнаме

"Исламнаме" - өлең түрінде жазылған тарихи шежіре. Авторы - ұйғыр ақыны Молла Мұхаммед Абд әл-Әлім бен Ахун Арзу Мұхаммед. Шығарма 18 ғасырдың екінші жартысында шағатай тілінде жазылған. Автор шығарманы діни қауымдастық жетекшісі Аппақ Қожаның ұрпақтарын мадақтауға арнаған. Шығарма Шығыс Түркістан мен Жоңғар хандығының тарихын зерттеуде құнды дерек көзі болып табылады. Автор өзі баяндаған бірқатар оқиғалардың куәсі болған. "Исламнамеде" жоңғарлардың қазақтармен арадағы соғысы, қытай әскерлерімен шайқасы туралы мағлұматтар берілген. "Исламнаменің" екі нұсқасы бар. Олар Ресей Ғылым Академиясының Санкт-Петербургтегі Шығыстану институтында сақтаулы. "Исламнаменің" жеке үзінділері "Материалы по истории казахских ханств XV - XVIII (А.-А., 1969) атты жинақта жарияланған.