Италия-эфиопия соғыстары

Италия - Эфиопия соғыстары - Италияның Эфиопияға қарсы жүргізген соғыстары, Шығыс Африкада өз үстемдігін орнату мақсатын көздеді. 1895-1896 жылғы соғыс. 1895 жылдың аяғында генерал Баратери бастаған Италия әскерлерінің Тигре провинциясын басып алуынан басталды. 1895 жылы 7 желтоқсанда Амба-Алаги түбіндегі ұрыста Эфиопия әскері Италия әскерлеріне алғаш рет күйрете соққы берді. 1896 жылы 1 наурызда Адуа (Адува) түбінде қырғын соғыс болды. Онда 20 мың Италия армиясы талқандалды. 1896 жылы 26 қазанда Аддис-Абебада қол қойылған шарт бойынша Италия Эфиопияның толық суверенитетін мойындады. 1935-1936 жылғы соғыстар 30 жылдарда Италия өз отарлары Эритрей, Италия Сомалиында ірі әскер күшін жинақтады. 1934-1935 жылы Эфиопиямен бірнеше шекаралық арандату соқтығыстарын жүргізді. 1935 жылы 3 қазанда Италия армиясы Эфиопия жеріне басып кірді. Италия әскерлеріне Эфиопия әскерлері қарсылық көрсетті, алайда шегінуге мәжбүр болды. 1936 жылы 5 мамырда Италия әскерлері Аддис-Абебаны алды. Дегенмен, Эфиопиядағы партизан соғысы 1941 жылдың мамыр айына дейін толастамады.

Дереккөздер

Қазақ совет энцеклопедиясы. 4 том