Ишхан Барсегович Сарибекян

Ишхан Барсегович Сарибекян(7.11.1912, Армения, Иджеван ауданы,Кошкота селосы - 6.5. 1990, Ақмола облысы,Есіл ауданы) - 2-дүниежүзілік соғысқа катысушы, аға сержант, пулеметшілер тобының командирі,армян. Ереван жеміс-жидек техникумын бітірген. 1941 жылдан Кеңес әскері қатарында майдандағы ұрыстарға қатысты. 1369-атқыштар полкі(4-Украина майданы 51-армия 417- атқыштар дивизиясы) пулемет расчетінің командирі аға сержант Сарибекян 1944 жылы 7 мамырда Севастополь түбіндегі Сапунгорадағы шабуылға қатысты. Осы шабуылда Сарибекян пулемет оғымен жаудың 9 атыс нүктесін, 50-ден аса әскері мен офицерлерін жойды. Шайқас кезінде жараланған нысана көздеушінің орнына келген Сарибекян жаудың автоматшылар взводын оқтың астына алды. Жараланған, қолына граната ұстаған ол жауға қарсы ұмтылып, артынан бірнеше жауынгерлерді ілестіре, траншеяның келесі шебіне бірінші болып кірді де, гранатамен жаудың атыс нүктесінің көзін жойды. Осыны пайдаланған Кеңес әскері алға жылжып, жаудың кезекті қорғаныс шебін басып алды. КСРО Жоғарғы Кеңесі Төралқасының Жарлығымен Сарибекянға Кеңес Одағының Батыры атағы беріліп, Ленин орденімен және «Алтын Жұлдыз» медалімен марапатталды (24.3. 1945). 1-дәрежелі Отан соғысы, 3-дәрежелі Даңқ ордендерінің иегері. Соғыстан кейін Сарибекян Ақмола облысы,Есіл ауданы,Курск ауылында тұрды. Сапунгорадағы ерліктерін есте сақтау мақсатында сол жерде мемориалдық кешен орнатылып, онда Сарибекянның есімі жазылды.