Карзин алхоры

Карзин алхорысы - алхоры жемісінің сорты. Канада мен Америка алхорыларын будандастыру негізінде шыққан. Бұта немесе ағаш күйінде биіктігі 2-5 метр болып өседі. Уссурий сортынан кейінгі суыққа төзімді сорт осы. КСРО-на 1912 жылы әкелінген, Сибирьде ол осы сортты әкеліп таратқан кісі- агроном Карзиннің есімімен аталған.

Карзин алхорысы алғаш рет Омбы мен Есілкөлде отырғызылған. Бұл жерлерде ол жемісті тез салды, өнімді өте көп берді, қысқы суыққа өте төзімді болды. Карзин алхорысының қысқы суыққа төзімділігі мен жеміс өнімін мол беретіндігіне қоса тағы бір ұнамды ерекшелігі- кеш гүлдейтіні. Мысалы, Қазақстанның солтүстік-шығыс облыстарында Уссурий алхорысы 8-10 мамырдан 15-16 мамырға дейін гүлдейді, ал Карзин алхорысы 16-17 майдан 26-27 мамырға дейін гүлдейді.

Карзин алхорысының жемістерінің пішіні мен түсі әр алуан, қабығы дөрекі әрі тығыз, жұмсағы талшықты және тәтті, сүйегі жұмсағына жабысып тұрады.

Карзин алхорысының өскіндері 1959 жылы Орал, Гурьев, Ақтөбе және республикамыздың барлық солтүстік, солтүстік-шығыс облыстарында өсірілді, ал 1965 жылы Алматы облысының шөл-далалы аймағында өсірілген.