Кептіргіш

Кептіргіш – материалдан ылғалды буландырып кептіретін құрылғы.Кептіргіш қатты материалдарды кептіруде кеңінен қолданылады. Оның түрлері: конвективті кептіргіш (материал қызған ауамен жанасады), түйіспелі кептіргіш (материал ыстық нәрсенің бетіне тиеді), сәулелі кептіргіш (жылу ыстық нәрсенің бетінен сәуле тарату арқылы беріледі), индукциялы кептіргіш (жылу жоғары жиілікті токтан таралады). Кептіргіш атмосф. қысымда не сиретілген газды ортада, вакуумда не жоғары қысымда (кептіру баяу жүруі үшін) жұмыс істей алады. Құрылымы мен тех. сипатына орай кептіргіш әр түрлі мақсаттарға пайдаланылады. Кесек материалдарды (көмір, кентас, саз, құм, минералды тыңайтқыштар, т.б.) кептіру үшін барабанды кептіргіш, талшықты материалдарды (жүн, мақта, т.б.), көкөніс, жеміс-жидек, зығыр, т.б. заттар үшін таспалы кептіргіш, созылмалы (сағыз тәріздес) және сұйық заттарды (сүт) кептіруде цилиндрлі кептіргіш қолданылады.