Кепілпұл

Кепілпұл (ағылш. deposit, advance, pre-payment) – міндеттемелерді қамтамасыз ету тәсілдерінің бірі. “Қазақстан Республикасының Азаматтық кодексі” бойынша, уағдаласушы тараптардың бірінің шарт бойынша өзінен есептелетін төлемнің есебінен басқа тарапқа беретін ақшалай сомасы. Шарттың жасалғанын дәлелдейді және оның орындалуын қамтамасыз етеді. Кепілпұл туралы келісім кепілпұлдың сомасына қарамастан жазбаша жасалуға тиіс. Міндеттеме орындалмастан бұрын тоқтатылған жағдайда тараптардың келісуімен не орындаудың мүмкін еместігі себепті кепілпұл қайтарылуға тиіс. Келісімшарттың орындалмағаны үшін кепілпұл берген тарап жауапты болған жағдайда ол екінші тарапқа кепілпұлдың екі есе мөлшердегі сомасын төлеуге міндетті. Бұған қоса, келісімшарттың орындалмағаны үшін жауапты тарап екінші тарапқа, шартта өзгедей көзделмесе, келтірілген залалды да кепілпұл сомасына қоса төлеуге міндетті. Сөйтіп, кепілпұл үш атқарымды: тараптардың келісімшарттық қатынасқа түскендігін айғақтайтын дәлелдемелік атқарымды; келісімшартта көрсетілген баға ішінара төленетін төлемдік атқарымды; тараптардың бірі келісімшарт талаптарын бұзған жағдайда залал шеккен тарап мүддесінің қорғалуын қамтамасыз ету атқарымын орындайды.