Кесене күмбезі

Кесене күмбезі– Ресейдің Челябі облысы Варна темір жол станциясынан шығысқа қарай 3 км жерде, Үлкен және Кіші Кесене көлдерінің маңында орналасқан 16 ғ-дың архитектуралық ескерткіші. Ғимарат – пештақты-шатырлы, шаршы пішінді, ауд. 6,56,5 м, биікт. 16 м құрылыс. Алдыңғы бас қасбеті шомбал пештағымен оңт-ке бағытталған. Пештақ қуысының төбесі итарқа тәрізді сүйір арка иімі келтіріліп жабылған. Есік ойығының маңдайшасы жарты шеңберлі аркамен көмкерілген. Алдыңғы бас қасбеті, пештақ қуысын айнала, П әрпі тектес, қос қатарлы белдеумен бедерленген. Пештақтың және қалған үш қабырғаларының жоғ. шеттері бұғатпен жиектелген. Текше пішінді құрылыстың он екі қырлы шатырлы күмбезі он екі қырлы биік мойындыққа табан тіреп тұр. Кесене күмбезі әк ерітіндісі пайдаланып күйдірілген кірпіштен қаланған. Кесене күмбезін 1979 ж. Қазақстан Мәдениет министрлігінің, ескерткіштерді жөндеу және қалпына келтіру мекемесінің экспедициясы зерттеген (жетекшісі М.Сембі). 1981 – 83 ж. сол кездегі Челябі облысы атқару к-тінің мәдениет бөлімі қарамағындағы ЕСкерткіштерді жөндеу және қалпына келтіру шеберханасы, тарихи деректерге сүйене отырып, ескерткішті қалпына келтіру жұмыстарын жүргізді.