Кэстель Джон

Кэстель Джон - Ресейде қызмет еткен ағылшын суретшісі. 1734-37 жылдары Орынбор экспедициясында топограф-суретші. Орыс әкімшілігінде аманатта жүрген Ералы сұлтанмен танысып, Орынбордан Кіші жүз ханы Әбілқайырға барды. Кэстель және оның тілмәші Дитрих Лютфос, А. И. Тевкелевтің қызметшісі Құлбай Арал теңізі маңындағы хан ордасында 1736 жылы 19 маусымнан 5 шілдеге дейін болып, Жайық, Самара, Симбирск қалалары арқылы Орынборға оралды. Оның "Орыс мемлекетінің игілігі үшін" 1736 жылы Орынбордан қырғыз-қайсақ ордасының ханы Әбілқайырға жасалған саяхатының күнделігі 1784 жылы И. Ф. Гарткнохтың "Ресей" тарихы туралы материалдар атты жинағына қосымша ретінде Ригада жарық көрді. "Күнделікте" Әбілқайыр мен Бопай ханым, олардың баласы Ералы, Күдер батырды бейнелеген және қазақтардың жайлауға көшуі, өзеннен өтуі, шетелдіктерді қабылдау рәсімі сияқты т. б. этнографиялық танымалдық маңызы бар суреттер берілген.

Дереккөздер

↑ .Қазақ ССР 4 томдық қысқаша энциклопедия./Бас редактор Р.Н. Нұрғалиев;Алматы; Қаз.Сов. Энциклопед. Бас. редак. 1989 ISBN 5-89 800-009-7