Күзет иті

Күзет иті — мемлекет шекарасын, әскери (жеке) нысан, мүліктерді (кәсіпорын, қойма, мал қорасы, т.б.) күзетуге әдейі үйретілген ит. Күзет иті – шекара сақшысының, әскери күзет қызметінің, қорықшының, бақташының серігі. Күзет иті күзетілетін жерге бөтеннің келгенін үріп сездіреді, оған тап береді, қуып жетуге, іздеп табуға көмектеседі. Күзет итінің ішінде көп тарағаны - Шығыс Еуропа овчаркасы.

Бұл – денесі ірі, пысық, кайратты, күтімге көнбіс, оңай дағдыланғыш, күзетке де, бақташылыққа да жарамды ит. Орта Азия овчаркасы да малды қасқырдан қорғауға машықтанған, батыл, қабаған, ірі, қозғалысы сабырлы, ашулы, сақ келеді. Орыс овчаркасы шапшаң, қорғау істеріне оңай дағдыланады. Күзет итінің Қазақстанда көп тарағандары – Шығыс Еуропа мен Орта Азия овчаркасының тұқымдары.