Күндешік

Күндешік (Elatіne) – күндешіктер тұқымдасына жататын бір, екі жылдық су немесе су жағалық ұсақ өсімдіктер. Негізінен қоңыржай және тропиктік аймақтарда кездесетін 25 түрі белгілі. Қазақстанда 5 түрі (дымқыл күндешік, имекдәнді күндешік, саздақ күндешігі, үш аталық күндешігі, мадьяр күндешігі) кездеседі. Олар суда 30–40 см тереңдікте, құмда, батпақты жерлерде өседі. Сабағы 0,7–40 см, жатаған, бұтақтанған, сабақ буындары тамырланып келеді. Шыршаға ұқсас жапырақтары қарама-қарсы немесе шоғырлана орналасқан, жапырақ шеті тегіс болады. Гүлдері ұсақ, ұзынша гүлсидамы жеке, кейде шоғырлана жапырақ қолтығына орналасқан. Тостағанша жапырақшалары төрт бөлікке бөлінген. Күлтесінің саны 4, ақ және қызғылт түсті. Аналық мойны және қорапша ұясы 2–4. Аталық саны да осындай, кейде екі есе көп болады. Маусымнан қыркүйек айларына дейін гүлдеп, жемістенеді. Жемісі – домалақ қорапша, оның жоғарғы бөлігі қысыңқы. Тұқымы көп, ұзынша, сегіз қырлы, қоңыр түсті, көлденеңінен қатпарланған. Тұқымы ағын сумен не құстар арқылы таралады.

Күндешік