Күнтумыш

Күнтумыш (туған-өмір жылдары белгісіз) – орта ғасырда Талас өңірін жаудан қорғаған батыр. Күнтумыш туралы мәлімет «Төрелібектің төрт ұлы туралы әңгіме» деп аталатын аңызда келтіріледі. Аңыз желісіне қарағанда Күнтумыш Сырдария өзененің жоғары ағысында билік жүргізген Абдолла ханның баласы болған. Талас өңірінің ханы жат жерден келген жауға қарсы соғыста Күнтумыштан көмек сұрайды. Хан Күнтумышқа өзінің сұлулығы бүкіл мұсылмандарға аңыз болған үлкен қызы Ботагөзді беруге даяр екенін білдіреді. Күнтумыш бұл хабарды алысымен жорыққа шығады. Талас жерін жаулаған Әжіханға қарсы шауып, хан ордасына оралған Күнтумышты Ботагөз қарсы алады. Әжіхан екінші рет шабуыл жасағанда Күнтумыш жауды Тектұрмасқа дейін қуады. Осы соғыста Күнтумышқа оқ тиіп, қатты жаралы болады. Жаралы батыр Талас өзененің жоғары сағасындағы Үлкен қақпа деген жерге келгенде, қансырап құлап жан тапсырады. Аңызда Күнтумыштың қандай жаумен соғысқаны анық көрсетілмейді. Ел үшін жанын қиған батырды ел ардақтап жерлейді. Күнтумыштың анасының басшылық етуімен оның қабірінің үстінен кесене тұрғызылады. Бұл кесене қоқандықтар үстемдігі кезінде қиратылып, оның кірпіштері Әулиеата мешітін салуға жұмсалған көрінеді.