Көкен Төлепбергенұлы

Төлепбергенұлы Көкен (1882, Үштаған – 1970, Үштаған ауылы) – діни қайраткер, ақын. Әкесі Төлепберген Мекке-Мединеге барып, дін мектебінде оқыған тұңғыш маңғыстаулық болған. Әке жолын қуған Төлепбергенұлы Мысырда оқып білім алып, ағасы Нұрнияз екеуі ахун атанған. Оқуын бітіріп елге келген соң Сазды жеріндегі Нұрнияз ахун салдырған мешітте бала оқытты. Төлепбергенұлы діни білімдарлығымен қатар үлкен ойшыл, ақынжанды адам болған. Мешітте бала оқытқаны үшін «халық жауы» атанып, 1937 жылы он жылға жер аударылады. Сегіз жылын түрмеде өткізіп, 1945 жылы елге оралды. Оның Сәттіғұл ақынға өлеңмен жұмбақ жазуы, Шәкей салдың (Жібектің) жұмбағын шешуі діни білімдарлығын ғана емес, Төлепбергенұлының ақындық қабілетінің де күштілігін байқатады. Ол түрмеде отырған жылдары туралы қасіретті толғауларын шығарған. Бірақ соңына көп мұра қалдырмаған.