Лев Михайлович Рощин

Лев Михайлович Рощин(30. 9.1922, Өскемен қаласы - 20.2.1958, Ресей, Пятигорск қаласы) - 2-дүниежүзілік соғысқа қатысушы, ага лейтенант, ұшқыш, эскадрилья командирі, орыс. Мектептен кейін фабрикака-зауыт училищесін (ФЗО) бітірді, радиомеханиктер курсында және аэроклуб мектебінде оқыды. 1940 жылы Кеңес әскері қатарына шақырылып, 1941 жылы Томск ұшқыштар дайындайтын әскери-авиациялық мектебін бітіріп, Ұлы Отан соғысы майданында болды. 1944 жылдың мамырында Севастополь қаласына жақын маңдағы Сапунгора өңірінде және Қырым түбегінің Оңтүстік-батыс жағалауында қиян-кескі ұрыстар кезінде Рощин бастаған Ил-2 авиациялық эскадрилья жаудың отты ұялары мен адам күшін жою үшін бірнеше рет ұшып шықты. 6-7 мамырда олардың 3 ұшағын құлатып, жанармай қоймасын өртеп жіберді. 190-штурмдық авиация полкінің (2-Прибалтика майданы 15-әуе армиясы 214-штурмдық авиация дивизиясы) эскадрилья командирі. Рощин 1944 жылдың тамызының ортасына қарай 470 рет жауынгерлік тапсырма орындады. 1941 жылдың 15 желтоқсанынан 1944 жылдың 15 қыркүйегіне дейін жаудың 31 танкісі мен 137 автокөлігін жойды, 59 далалық зеңбірегінің үнін өшірді, 29 дзот пен 31 блиндаждың талқанын шығарды, 3 паровоз бен 31 жол вагонын өртке орады, гитлершілердің мыңнан аса әскері мен офицерлерін жойды. Сондай-ақ ол жаудың 3 ұшағын құлатып, жердегі 12 ұшағын жойды. Ұрыста көрсеткен батылдығы мен батырлығы үшін Рощинге КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (26.10. 1944). Соғыстан кейін Рощин Әскери-әуе күшінде қызметін жалғастырды. 1951 жылы Жоғары ұшу-тактика курсын бітіріп, мінсіз қызмет етті. Ол әскери міндетін орындап жүріп қаза тапты. Пятигорск қаласындағы зиратта Рощинге арналып мәрмәрдан обелиск орнатылған. Өскемен қаласындағы бір көшеге Рощиннің есімі берілген. Ол сондай-ақ Ленин, 4 рет Қызыл Ту, 2 рет Александр Невский, 2-дәрежелі Отан соғысы, 3 рет «Қызыл Жұлдыз» ордендерімен марапатталды.