Лездеткіш

Лездеткіш (Скороварка) — тамақты тез пісіруге арналған ерекше құрылмалы кастрөл. Жай кастрөлге қарағанда 3-4 есе тез пісіреді. Ыдыстың герметикалығының нәтижесінде ішіндегі қысым мен температура 120°С-қа дейін көтеріледі. Лездеткіштің қақпағында екі клапан орналасқан: іштегі қысымды 0,9—1,1 атмға тең етіп тұрақтандыратын — жұмыс клапаны және қысым 1,5 атм-дан жоғары болып, жұмыс клапаны бұзылған жағдайда іске қосылатын сақтандырғыш клапан қайнау кезінде жиналған артық бу жұмыс клапанындағы тесік арқылы шығады. Тездеткіште қайнатып, бұқтырып және бумен пісіруге болады. Тездеткіште пісірілген тамақтың жұғымдылығы мен дәмі сақталады. Лездеткіш компот әзірлеуге өте ыңғайлы, бірнеше минут ішінде жеміс жұмсарып, өзінің түсі мен дәмін өзгертпейді. Әдетте, жылдам пісіретін кастрөлдің сыйымдылығын 4,5 және 6 литрлік етіп шығарады. Оны кез келген қыздырғыш аспаптарға орналастыруға болады. Лездеткіштің ішіне азық-түлікті 3/4 бөлігіне (келтіріп, ал қайнау кезінде көбігі көп шығатын және көп көтерілетін (макарон, жарма және т. б). азықты толтырмай орта ғана салу керек.

Лездеткіш