Леонид Степанович Резвых

Леонид Степанович Резвых(1921, Сібір - 1.3.1959, Ресей, Кемерово облысы, Березовский қаласы) - 2-дүниежүзілік соғысқа қатысқан, аға сержант, сапер. 1940 жылы Кеңес әскері қатарына алынып, кіші командирлер мектебін бітірген соң, 1941 жылдың қарашасында майданға келді. 206-инженер-саперлер батальонының бөлімше командирі Резвых Мәскеу қаласының айналасына мина қоюға қатысып, «Ерлігі үшін» медалімен марапатталды. Мина қойылған аймақтарды тазарта отырып, 33-армияның жауынгерлері мен танкілерін Беларусь пен Смоленщинаға алып өтті. Висла мен Берлин маңайындағы жау қорғанысын бұзып өтуге қатысты. 1945 жылы 19 каңтарда Висладағы жау қорғанысын бұзу кезінде полк бөлімшесі жау оғының астында жүріп, мина қойылған жерден 257-танк полкін өткізу үшін 40 метрлік 2 жол жасап, минадан тазартты. 298 танкіге қарсы минаны істен шығарды. Осы ерлігі үшін Резвыхқа КСРО Жоғарғы Кеңесі Төралқасының Жарлығымен Кеңес Одағының Батыры атағы беріліп, Ленин орденімен және «Алтын Жұлдыз» медалімен марапатталды (27.2.1945). Резвых Қызыл Ту, «Қызыл Жұлдыз», Отан соғысы ордендері мен бірнеше медальдардың иегері. Соғыс аяқталған соң Кемерово облысындағы «Оңтүстік» шахтасында жұмыс істеді. Қайтыс болғаннан кейін шахтада мемориалдық тақта орнатылып, Резвых тұрған Рабочая көшесіне есімі берілді.