Лисаков жер асты су кен орны

Лисаков жер асты су кен орны - Тобыл өзенінің оң жағалауында, Қостанай облысы Лисаковск қаласының оңтүсігіндегі Лисаковка қыстауынан Бейімбет Майлин ауданындағы Павловка ауылына дейін 50 км-ге созылып жатыр. Лисаков кен байыту комбинатын шаруашылықтық және ауыз сумен қамтамасыз етуге байланысты барланған.

Геологиялық құрылымы, сипаты

Кен орнының сулы горизонты төрттік кезеңнің жұқа қабатты шөгінділері жапқан орта олигоценнің аллювийлі шөгінділерінде шоғырланған. Суы тұщы, гидрокарбонатты натрийлі және натрий-кальцийлі , минералдылығы 0,1-0,5 г/л. Суда темірдің мөлшері жоғары. Есептік сутірек 33 ұңғымадан тұрады. Сутіректің жалпы ұзындығы 50 км. Ұңғымалар аралығы 1500 м. Кен орны 1972 жылдан пайдаланылуда.