Лондон металдар биржасы

Лондон металдар биржасы - 1877 жылы шет елдерден импортталатын түсті металдардың үлкен бөлігін орталық рынокта қамтамасыз ету үшін құрылған.

Онда мыс, қорғасын, мырыш, алюминий, күміс, никель металдарына мәмілелер жасау жүзеге асырылады. Биржа металдарының ресми бағасы әлемдегі барлық өндірушілер мен тұтынушылардың ұзақ мерзімдік келісім-шарттарды бекітуі бойынша белгіленеді. Жасалған барлық мәмілелерге Халықаралық тауарлы-клирингтік палатасы кепілдік береді. Бұл рынокта мәмілелер мен қызмет көрсетулерді өз мерзімінде қамтамасыз ету үшін қажет. Клирингтік палатаға мүше болу мәселесін палатаның директорлар кеңесі шешеді, ол тәуелсіз орган болып табылады.

Металдар биржасының сауда күні құрылғаннан бері онша көп өзгерген жоқ. Алғашқы кезеңдерде сауда-саттық бормен еденге дөңгелектене сызылып, тіке дауыстап шақыру арқылы жүргізілген. Бүгінде басқаша, сауда жасалатын зал ішіне айналдыра қызыл түсті былғарымен қапталған 36 жұмсақ орындық қойылған. Сауда жасаушы трейдерлер осы орындықтарда орналасады, бірін-бірі көріп отырады. Сауда кезінде олардың ешқайсысына артықшылық берілмейді. Клиенттер өз тапсырыстарын сауда алаңындағы брокерлер мүшелері арқылы береді. 36 орындықтың айналасына ағаш діңгек орнатылған. Шеңбердің сыртындағы жасыл түсті еденде трейдерлердің кабинасы орналасқан. Ал трейдерлер өзара мәмілелерді айқайлап жүзеге асырады.

Биржадағы сауда тәулік бойы жүреді. Дегенмен, түсті металдар саудасы Лондон уақыты бойынша ертеңгі сағат 7 мен кешкі сағат 19 аралығында қыза түседі. Биржа мамандарының айтуынша, саудаға күннің бірінші жартысында негізінен азиялық фирмалар, екінші жартысында АҚШ-тың компаниялары қатысады. Саудаға шығарылған металдар биржаның қойған талабы деңгейіне сәйкес келуі қажет. Онсыз сауда-саттық орынтағына отыра алмайсың.