Мал көрмесі

Мал көрмесі — мал шаруашылығы мәдениеті мен малдардың өнімділік-тұқымдық қасиеттерін жақсартуға бағытталған іс-шара. Көрме ұйымдастыруда көзделетін негізгі мақсаттар: мал тұқымын асылдандыру саласындағы ғылым мен озық тәжірибенің жетістіктерін жарнамалау мен насихаттау; асыл тұқымды мал өсірумен айналысатын түрлі меншік иеліктеріндегі шаруашылықтарға қолдау көрсету; мал тұқымдарын асылдандыру жұмыстарын болашақта қандай бағыттарда жүргізу қажеттігіне бағдар беру; мал шаруашылығымен айналысатын немесе өндірістік қызметі осы саламен байланысты барлық субъектілерді асылдандыру жұмыстарының талапқа сай жүргізілуіне қызығушылығын арттыру және олардың кәсіби деңгейін көтеруге ықпал ету. Тақырыбы мен түлік түрлерінің қамтылу дәрежесіне сай, көрмелер жалпы мал шаруашылығы және арнайы бағыттағы мал шаруашылығы көрмелері болып бөлінеді. Әкімшілік-аумақтық көлеміне орай олар халықаралық, республикалық, облыстық, т.б. болып өткізіледі. Алғашқы ауыл шаруашылық көрмесі 1923 жылы өткізілді, 1939 жылдан Бүкілодақтық ауыл шаруашылығы көрмесі тұрақты жұмыс істеп келді. Халық шаруашылық жетістіктері көрмесінің құрамында мал көрмесі елеулі орын алады. Қазақстанда қазіргі кезде жылына бір рет (негізінен, фермерлер күніне байланысты) облыстық деңгейдегі көрмелер өткізіледі.