Мамай Салпықов

Салпықов Мамай (1894, Маңғыстау ауданы, Тұщықұдық ауылы – 1931) – Адай көтерілісінің басшыларының бірі. Маңғыстаудағы Адай көтерілісі Ф.И. Голощекиннің «Кіші Қазан» орнатпақ саясатына қарсы басталды. Осындай қиын кезеңде жер-жерде өкіметке қарсы астыртын ұйымдар жұмыс жасап, жасақтар құрылды. Сондай жасақтардың бірін Тұщықұдық, Ақшымырау бағытында беріш руынан шыққан Салпықов басқарды. Салпықов соңына жасақ ертіп, халықтан тартып алынған малдарды иелеріне қайтару жолында да еңбек етті. «Шәудір» жерінде күші әлденеше есе басым қызылдармен шайқасып, жеңіліске ұшырайды. Өз жасағы мен көшін Үстірттің тасалау жерлерімен шегіндіре отырып, «Бесшымырау» құдығына жақындау жердегі «Мықтыбайдың қызыл үйігі» жеріне келгенде, қызылдардың қоршауына түсіп, өзі де мерт болады. Салпықов туралы Т.Орақовтың «Қасіретті көш» кітабы жарық көрді.