Мастик

Мастиктер деп заттың бетіне жағылатын қорғағыш әрі әрлендіргіш рең беретін полимерлік негіздегі заттарды айтады. Жалпы мастиктерді үлкен үш топқа бөледі:

1) органикалық еріткіште әзірленген балауызды мастиктер;

2) сулы мастиктер;

3) сулы-эмульсиялы мастиктер.

Бұл үш топтағылар да қатты, паста және сұйық күйінде өндіріледі. Органикалық еріткіш негізінде дайындалатын балауызды мастиктер паркет едендерді өңдеп тазалау үшін қолданылады. Ол, негізінен, бензин, скипидар, уайт-спирит сияқты органикалық еріткіште әзірленеді. Оларды линолеум, пластиктерге қолдануға болмайды, себебі ерітіп жібереді. Бұлар жақсы жағылады және жылтырайды, кемшілігі — жағымсыз иісі болады. Сулы мастиктер, негізінен, балауызды заттар мен эмульгатордан тұрады. Оны концентрат түрінде өндіреді және басты артықшылығы — негізділігі. Оларды пайдаланар алдында суда ерітеді. Құрамында суы болғандықтан, оларды керісінше ағаш негізді заттарға емес, линолеум мен пластиктерге қолданады. Сулы мастиктердің құрамы, негізінен, балауыз, беттік-белсенді заттар (ББЗ) және судан тұрады. Сулы-эмульсиялы мастиктердің құрамында органикалық еріткіштің мөлшері шамалы болады. Сондықтан онымен кез келген беткейді тазалауға болады. Олардың кейбіреулерінің құрамында бактерицидті заттар болатындықтан, санитариялық-гигиеналық мәні зор, бөлме ішінің ауасын тазартады. Құрылыста, химиялық-технологиялық құралдарды тығыздау үшін, беріктігін арттыру үшін желімдегіш мастиктер колданылады. Олар тұтқыр және құрамында толықтырғыш заттары болғандықтан, желімдерден өзгеше болады. Мастиктердің бәрі де тұрмыста қолданылатын заттарды, еденді, жиһазды тазартып әрі жылтыратып, корғаушы қабат түзеді. Қазіргі кезде жиһаз бетіне ұсак электростатикалық шаң жиналмас үшін мастиктің арнайы антистатик заттар косылған жаңа түрлері, сондай-ақ антикоррозиялық мастиктер, т.б. түрлері шығарылуда.