Маңғыстау телевизиялық орталығы

Маңғыстау телевизиялық орталығы - Ақтауда орналасқан облыстық телевизиялық орталық

Тарихы

• 1970 ж. шілде айында Гурьев облысының Шевченко телевизиялық орталығы құрылды. Шевченко қалалық студиясының ең алғашқы директоры М.Мезгілбаев болды. Телевизиялық орталықта ауданы 100 м2. студия, онда КТ-17 маркалы 2 телекамера болды. «Район» маркалы жабдық арқылы бірінші сынақ бағдарламасы эфирге берілді. 15 тамызда Шевченко телестудиясының алғашқы телехабары жарыққа шықты.
• 1972 ж. 28 желтоқсанда Гурьев облысының Шевченко телевизиялық орталығы Шевченко радиотелеорталығы болып өзгертілді. Орталық директоры С.Оразғалиев болды. Маңғышлақта 4500 км жерді қамтитын тұңғыш республикалық телевизиялық арна хабарлары көрсетіле бастады. Маңғышлақ облысының құрылуына байланысты 1973 ж. 20 наурызда Шевченко телестудиясы негізінде Маңғышлақ облысы Шевченко радиотелеорталығы (директоры М.Қисамединов) болып қайта құрылды. 3 мамырда Шевченко қаласында орнатылған радиотораптан тек қана қала аумағын қамтитын бірінші радиохабар эфирге берілді. Кейіннен әскери машиналарда орналасқан қабылдағыштар арқылы радиосигналдар облыс көлеміне тарайтын болды. Қуаттылығы 25000 Вт «Буры» радиостанциясы іске қосылып, радиосигналдар облыстан тыс жерлерге (Ақтөбе, Грузия, Финляндияға, т.б.) тарады.
• 1974 ж. 5 наурыздан бастап «Орбита» ғарыштық байланыс станция арқылы жалпыодақтық орталық телеарнаның хабарларын қабылдау мүмкіндігі туды.
• 1975 ж. тұңғыш рет «Электрон» бейнемагнитофоны пайда болды.
• 1978 ж. Маңғышлақ облыстық телерадио комитеті Маңғышлақ облыстық Халық депутаттары кеңесі атқару комитетінің телевизиялық және радиохабарларын тарату жөніндегі комитеті болып өзгертілді. Студияны әр жылдары С.Иманғалиев, В.В. Иванович, Л.С. Шульц, Ғ.Теміртасов, К.Есімов басқарды. 1986 ж. Аппаратты студия кешенінде түрлі түсті жабдық орнатылды.
• 1988 ж. Маңғышлақ облысының қайта жабылуына байланысты Маңғышлақ облыстық Шевченко радиотелеорталығы Гурьев облысы Шевченко радиотелеорталығы болып өзгертілді.
• 1990 ж. қазан айынан бастап Маңғыстау облысының құрылуына байланысты Шевченко қалалық телестудиясының және Шевченко радиотелеорталығының қайта ұйымдастырылуы негізінде тәулігіне 1 сағат телехабарларын, 1,5 сағат радиохабарларын тарататын Маңғыстау облыстық телевизия және радиохабарларын тарату жөніндегі комитет құрылды.
• 1992 ж. қайта ұйымдастырылуға байланысты Маңғыстау облыстық телевизия және радиохабарларын тарату жөніндегі комитет Маңғыстау радиотелеорталығы мекемелері бірікті (директоры Т.Медетбек).
• 1994 ж. Маңғыстау облысы телевизия және радиохабарларын тарату жөніндегі комитет Маңғыстау облыстық телерадиокомпаниясы болып өзгертілді.
• 1996 ж. «Москва» қабылдау станциясы қондырылғаннан кейін «Орбита» станциясы «Дубль-4» телевизиялық арнасын қабылдай бастады (директоры А.Бектұрғанов).
• 1999 ж. 28 қаңтарда Қазақстанның кей облыстарында радиоөндірісі тоқтатылды. Маңғыстау облыстық телерадиокомпаниясының төрағасы П.А. Долматов болды.
• 2001 ж. Маңғыстау облыстық телерадиокомпаниясы «Қазақстан» республикалық телерадиокорпорациясының АҚ Маңғыстау облысы бөлімшесі болып өзгертілді.
• 2004 ж. 1 желтоқсанда облысы радио өз жұмысын тоқтатты. «Кателко» ғарыштық байланыс станциясы іске қосылып, облыстық компанияның хабарлары тәулігіне 1 сағат көлемімен бүкіл Маңғыстау облысын қамтыды. Облыс түкпірінің әрбір елді мекеніне тарайтын 45 қабылдау пункттері орнатылды. 11 наурызда жаңа телевизиялық цифрлық жабдықпен жабдықталған аппаратты студия блогы іске қосылды. 14 мамырда ҚР Президенті Н.Ә.Назарбаевтың тікелей эфирдегі сұрақ-жауабына тұңғыш рет Маңғыстау облысы да қатысты. Оны телеарнаның директоры И.Жұбаев жүргізді. 2004 жылдың 7 маусымынан бастап «Қазақстан» РТРК АҚ Маңғыстау облыстық бөлімшесінің директоры болып Жұбаев тағайындалды.
• 2005 ж. 1 қаңтардан бастап «Қазақстан – Ақтау» телеарнасы 6-арна арқылы 14 сағат, 8-арна арқылы 1 сағат хабар таратып, облыс тұрғындарының 96%-ын қамтып отыр. Эфирге арнаның 50-ден астам төл бағадарламалары беріліп, ол жалпы көлемінің 60%-ын құрады.
• 2007 жылдан бастап телеарнада театр секілді күзде жаңа маусыммен бастау дәстүрге айналды. Әр арна осы кезеңде тұщымды бағдарламалары мен хабарларын жұртшылыққа ұсынады.
• 2006 – 07 ж. Маңғыстау облысының аумағын толық қамтитын төл хабар тарату желісі құрылып, Жаңаөзен, Құрық, Жетібай, Форт-Шевченко, Шетпе, Бейнеу, Қаламқас елді мекендері төл арнаның тәулігіне 14 сағ. тарайтын хабарларын көре бастады. Ақпарат және мәдениет мин., Ақпараттандыру және байланыс жөніндегі агенттік пен Қорғаныс мин-мен келісе отырып, Маңғыстау облысы аумағындағы барлық аудан орталықтары мен қалаларда хабар таратуға мүмкіндік беретін жиіліктер алынды.

Биылғы жылдың тағы бір үлкен жетістігі АСБ кешенінен бейтарап жұмыс істей алатын жаңалықтар дайындап оны эфирге жіберу жүйесі құрылды. Жаңалықтарды қамтамасыз етіп келген АСК енді тақырыптық редакция бағдарламаларына қызмет етпек.

Жергілікті бағдарламалар

Күнделікті қазақ және орыс тілдерінде берілетін «Ақтау-ақпарат» жаңалықтар бағдарламасы, таңғы «Таңшолпан», «Төте сауал», «Вопрос ребром» блицсұхбаттары, сонымен қатар «Маңғыстау мақамдары», «Маңғыстау марғасқалары», «Маңғыстау мейманы», «Бая¬бан дала баяны», «Алқаласа әлеумет», «Түркі иман», «Саз сарын», «Қызым саған айтам», «Ойлан, тап! «, «Ойлар, ойлар...», «Оң мен сол», «Человек и его дело», «Қоғамдық қабылдау. Общественная приемная», «Ден сау болсын десеңіз», «Дежурная часть», «Тікенек», «Горячие бауырсаки», «Шанс», «Ән жолдасам деп едім», «Интеллектуал», «Қызық адам», «Ән шеру», «Сәулеғұмыр» бағдарламалары арнаның коммерциялық әлеуетін арттырып отыр. Жергілікті мәдениет мекемелерімен бірлесе отырып, телевизиялық музыкалық шоу бағдарламалар «Жаңа жылдық жұлдызды кеш», «Ән шырқаймын достарыммен», «Маңғыстаудың сегізінші қайқысы», «Ақтау жұлдыздары аналарды аялайды», т.б. өткізіліп тұрады.
Мемлекеттік тапсырысқа байланысты алған міндеттемелерді орындау мақсатында экономикалық «Майлықиян», «Эконом ИКС» «Стадион», «Бақ пен бап», «Семья», «Дала дидары» бағдарламалары да жүргізіліп тұрады. Маңғыстау теледидары техникалық жағынан стандартқа сай толық жабдықталған. Қазіргі Маңғыстау облысы «Қазақстан – Ақтау» телеарнасының директоры Р.Кенжеханұлы.